Sok waas na teh, mun masih keneh kohkol mah nu ditakol, tara ieuh waka digareuingkeun ku aki nu sok pangrajinna jeung pangheulana ka masigit, engke we mun geus waktuna nakol bedug Subuh, kakarek kabeh nu hares di masigit digareuingkeun.
Marandi di pancuran, bari teu make sabun mandi (sabun seungit harita mah nyarebutna ge), terus ngilu berjamaah sholat Subuh diteruskeun ku ngaji Safinah, Jurumiyah jeung Tijan. Beurangna kakarek sarakola umum. Nu ka SD atawa nu ka SMP. Balik sakola umum ge tara bisa ulin bebas da masih keneh kudu sakola agama ka Al-I’Anah, balikna sore kira –kira tabuh limaan.
Kitu jeung kitu we unggal poe teh. Pupujian di masjid. Matak bororaah bisa ulin siga barudak ayeuna. Komo deui harita mah da can usum warnet. Paling alus oge ulin teh ngadon lalajo tingalabring, kitu ge, mun poe Minggu atawa poe pere. Lalajona nu beurang, biasana nu jam sapuluh isuk. Nyaeta waas pisan atuh! Ngetik ge bari nyalangkrung ieu teh! Geus heula we ah nya carita baheula sok pupujian di masjid! Insya Alloh disambung deui. Wallohu’alam bissowab. Wassalam.(*)