MUMULUK ALIAS DAHAR ISUK

Ku: H.Dede Asy’arie

TI BUBUDAK geus dibiasakeun ku Ema uing, memeh miang ka sakola, kudu didadasaran heula cenah beuteung teh ku kadaangan. Pangpangna mah ku kejo jaman harita mah, ambeh teu kapiheulaan ku angin cenah. Salah sahijina ku mumuluk.

Sasarap teh minangka ngadadasaran eusi beuteung ku kadaangan. Aya nu nyebut ‘Sasarap’ aya oge nu nyebutna teh ‘Mumuluk’ sawatara ari pun Bapa mah, pedah lila teuing di Pasantren meureun, jadi sok nganggo istilah “Futuran”.

Bae lah nya, untung teu make istilah ‘Breakfast’ oge nurutan kabiasaan si Iron Man. Tah jaman uing keur budak mah anu jadi ‘Menu’ mumuluk teh biasana sok dipang nyieunkeun Sangu goreng karesep uing, nyaeta, Sangu goreng anu teu dikecapan, tapi ukur make Bawang (bawang beureum atawa Bawang daun) jeung Uyah.

Baca Juga: CIANJUR ANCUR DIENDAG KU LINI BADAG

Deungeunna ge tara make ceplok endog cukup jeung gorengan atawa kurupuk. Mun teu kaburu dipangnyieunkeun sangu goreng, cukup meuli Bubur Hayam di Mang Jajang atawa ku leupeut satangkep jeung gorengan suuk atawa oncom.

Pokona mah kitu we lah, menu keur mumuluk jaman harita estuning sagala kadaangan anu bahan bakuna tina Beas, kaasup oge wuduk, buras, kupat tahu atawa lontong kuah. Ngan anu can pernah kaalaman teh meureun mumuluk ku lotek atawa karedok we.

Beda ning ari bangsa deungeun mah, naon we anu asup kana beuteung dina isuk-isuk nyebutna  teh ‘breakfast’. Tiheula keur uing masih SMA, sok mindeng ngahaja ulin jeung turis di Cipanas maksudna mah hayang praktek bahasa Inggris.

Baca Juga: BEULEUM LAUK KANCRA

Hiji waktu jangjian menta nganteur ka Bandung. Isuk-isuk ngumpul di stanplat beus, harita mah handapeun Pasar Cipanas. Uing mah ti subuh keneh ge geus ngabubur hayam minangka ‘breakfast’ na teh, terus barang uing nanya ka turis tea, geus ‘breakfast’? ngajawab eunggeus cenah, daang rambutan!

Deuuuuh, pan uing mah diwanti-wanti ti bubudak ge, tong ngadaang bubuahan memeh beuteung kaaupan kejo! Matak rada ngahuleng harita ge, ngan teu papanjangan da kaburu datang beus anu tujuan Bandung.

Tah kabiasaan ‘Mumuluk’ isuk teh nepika ayeuna ge can robah. Mun teu dipangnyoeunkeun sangu goreng karesep tea ku indung barudak, pasti ngulincer neangan nu dagang kadaangan keur mumuluk.

Ayeuna mah teu hese neangan nu dagang kadaangan keur mumuluk teh. Kaluar ti gang hareupeun imah, geus nyampak tukang bubur hayam. Meuntas ka Barba, aya deui tukang bubur hayam. Gedengeunana Tukang Maranggi jeung wuduk. Encan beulah kuloneunana aya mang Sanip sarua dagang wuduk. Ngan bedana mang Sanip mah deungeun wudukna jeung goreng comhu, gehu, goreng tempe jeung bala-bala. Ngan mun leuwih ti jam salapan geus moal kabagean di Mang Sanip mah.

Mun di Warujajar mah leuwih leubeut deui, ti handap keneh aya Bubur Ma Wati anu kaasup Bubur Hayam ‘ Legend‘ Warujajar mah. Aya oge Baso Mas Senggol (ngan asa kurang pas nya mumuluk ku Baso mah). Gedengeunana aya wuduk jeung Sate Maranggi Ma Haji Nunung, terus deui aya Lontong Kuah.

Uing mah mun ka Warujajar deuk ngadon mumuluk teh sok ngahajakeun hayang ngawuduk di Mang haji Lili. Kacipta cai entehna anu karek cur jeung sok loba panggih jeung babaturan we deuih di warung wuduk mang haji Lili mah.

Ayeuna mah aya hiji deui anu jadi ‘sasaran’ ngadon mumuluk di Warujajar teh, nyaeta Warung Nasi mang Daguy. Anu nyadiakeun sangu rupa-rupa. Aya sangu Koneng, sangu beureum, sangu Hideung geus puguh ari sangu bodas mah.

Terus deui Soto hayam kampung ala Madura, di jalan Aria Cikondang. tiheula mah bakat ku loba nu meuli, jam salapan isuk leuwih saeutik geus nyamos teu kabagean.

“Ayeuna mah dugika jam lima sonten oge tiasa pa,“ ceuk si Mas Tukang Soto. Da geus boga jongko sorangan ayeuna mah. Ngontrak Toko anu baheula mah sok make pakarangan. Sakitu heula we nya? Wallohu’alam bisshowab, Wassalam. (*)

Tinggalkan Balasan

Alamat email Anda tidak akan dipublikasikan. Ruas yang wajib ditandai *