Lebaran taun kamari, geus kacipta ti memehna dina maleman takbir bakal rame ku sora dulag. Alhamdulillah, nepika derna malem Takbiran, ukur satakol dua takol kadenge sora dulag, kitu ge barudak pejuh pisan nu narakolna ge lain para pamuda. Ukur bisa ngaheruk, horeng enya jaman geus robah.
Dulag geus kasilep ku tingjelegurna Petasan buatan luar negri nu haregana lain bantrak-bantrakeun model uing. Dulag geus kalindih ku internet nu geus bisa ngahipnotis para pamuda jeung barudak sangkan ‘anteng’ jeung ‘daria’ maraen internetan. Sakapeung sok mikir, naha dimana sabenerna uing ayeuna hirup?
Kungsi ngalaman malem takbiran teu ngadenge sora dulag teh, waktu ngadon puasa di Mekkah! Geus puguh di Mekkah mah moal ngadenge dulag oge da moal manggih masjid nu make bedug! Tapi ari aya di Tatar Sunda mah, komo deui di Cianjur nu kasohor Tatar Santri nu geus biasa loba bedug di unggal masjid, asa aneh mun teu ngadenge dulag dina bulan Puasa Romadlon teh, komo deui dina maleman Takbir!
Baca Juga:SOLAT TARAWEHPANINEUNGAN PUASA JAMAN KEUR BUDAK
Nu kabandungan, barudak ngora lolobana dina maleman Takbiran teh, kalahka tingalabring dina motor lain ngarumpul di masjid bari maraca Takbir. Nu rame ngageder maraca takbir di masjid angger we eta deui eta deui.
Kokolot masjid ti ba’da Isya nepika jam sapuluh peuting, ditumbu ku ahli masjid sejenna nepika tengah peuting, hiji dua barudak ngora nu resep ka masjid milu mantuan, ka subuhnakeun ditumbu deui ku kokolot masjid nu tadi nepika bubaran solat Subuh.
Enyaan geus robah kabiasaan urang Cianjur teh. Lebaran ayeuna mah, di imah sorangan ge, geus tara pak-pik–pek nyadiakeun olahan keur acara silih anteuran rantang siga jaman uing keur budak. Geus arang nu obyag nyarieun kueh keur lebaran ayeuna mah, cukup pesen kana internet atawa liwat SMS atawa mareuli kueh ti toko.
Geus arang kaangseu pelengsengna seungit nu keur meuleum kueh rek nyanghareupan lebaran ayeuna mah. Nu rame mah angger we di pasar, di toko-toko pakean atawa di toserba jeung di jalan raya nu nyaliar kembang beulieun.