“Jarauh tempatna ge, kitu lah kira-kira saratus meteran” ceuk si Uwa deui bari nuluykeun dongengna cenah nu penting mah meunang tempat nu merenah jeung loba laukan, Lain beurang cenah nguseupna ge, mimitian ngalungkeun useup teh biasana ge sok liwat Isya .
“Tara sieun nyah Wa, nguseup tengah peuting kitu di walungan ?” ceuk budak, kaciri boranganana teh. “Nya atuh ari sieun mah, geus we tong hayang jadi tukang nguseup” tembal Uwana.
Tukang nguseup mah cenah, mun geus jorojoy hayang nguseup, paduli janari atawa tenagh peuting, paduli rek aya batur atawa sorangan, rek halodo atawa keur ngaririncik hujan, asal aya keur bekelna pasti indit. Kungsi cenah hiji waktu mah, ceuk si Uwa, geus leuwih jam sapuluh peuting, kusabab kesel diimah, bari kasampak
batur-baturna suwung, kabeh geus arindit ka Cisokan, bari hujan nu ngaririncik, nikreuh nyusul batur-baturna.
Sakitu tempat panguseupan di Cisokan teh cenah kudu ngaliwatan rungkun awi, ngaliwatan Astana, jaba kudu gugurawilan dina lamping memeh nepi ka tempat panguseupan teh ,tapi da ngaranna tukang nguseup, ceuk si
Uwa , geus taya nu dipikasieun.
Baca Juga:Pohon Raksasa Tumbang, Hancurkan Rumah dan MusalaDewan Pendidikan Larang Sekolah Minta Sumbangan Kepada Ortu Siswa Mengatasnamakan Program
“Komo ngaran-ngaran ku Jurig mah , dina ayana ge, dipake batur keueung we ku tukang nguseup mah” ceuk si Uwa bari seuri. Budak kaciri rada murungkut dibere dongeng uwana mah. “Tapi Uwa pernah diheureuyan
jurig waktu keur nguseup?” ceuk budak bari rada ngolesed diukna ngadeukeutan.
“Nya kungsi eta ge aya sababaraha kali” tembal Uwana bari terus nyaritakeun waktu diheureuyan teuing ku mahluk naon, ngan nu puguh mah cenah ukur wani ngaheureuyan, aya sora tingcikikik sora seuri awewe, aya oge nu niupan kana ceuli atawa sora nu seuri bari geueuman.
“Ah rupa-rupa tea we , ngan nu puguh mah dititah ngajirim bungkeuleukan mah teu daekeun, teuing sieuneun meureun ku Uwa” ceuk si Uwa mani semu agul. “Atuda panggih jeung si Uwa mah, jurig ge maraca ayat Kursi, bakat ku sieun!” cekeng bari seuri, si Uwa mani ngagakgak.