Ka beh dieunakeun, geus sakola di SMP mun teu salah mah. Pilem-pilem Amerika rada seuseut asupna ka Indonesia. Nya tidinya narekab pilem-pilem kaluaran Itali jeung ti Hongkong. Bentang Hongkong harita nyaeta Wang Yu, David Chiang. Ti Lung jeung sabalad-baladna. Pilem nu paling dipigandrung jaman harita mah nyaeta pilem James Bond nu jadi bentangna karek Sean Connery tea.
Usaha kana dunya hiburan di Cianjur harita karek Bioskop jeung bola sodok atawa Bilyard. Bioskop di Cianjur ge nambahan. Aya Plaza gedengeun Roxy nu geus ganti ngaran jadi Pusaka. Aya Aria di jalan Aria Wiratanudatar, aya Popsi di jalan Mohamamad Ali Cikidang jeung Century, minangka bioskop nu kaasup modern.
Ngan duka kumaha sanggeusna meuweuhna VCD, DVD di ampir unggal imah, usaha dunya hiburan kaasup bioskop di Cianjur beuki nyirorot. Ayeuna di Cianjur bioskop-bioskop nu dicaritakeun tadi geus taya dikieuna. Pusaka & Plaza geus jadi wangunan usaha perbankan jeung hiburan karaoke kulawarga.
Baca Juga:Malam Pertama Ramadan 2023 Korban Gempa Tarawih di Tenda DaruratSambut Ramadan, Warga Kampung Adat Miduana Gelar Ritual Khusus Mandi Keramasan Cai Kahuripan
Dunia Baru jeung Dewi geus jaradi toko. Century geus jadi toko baju. Popsi geus salin jinis jadi mini market sedengkeun, Sinar mah wallohu’alam deuk dijieun naon.
Enyaan ieu mah, sakapeung sok jorojoy asa hayang lalajo pilem teh di bioskop siga baheula! Tapi di mana? Piraku kudu ngahaja ulin ka Bogor atawa ka Bandung, ngan sakadar nganteur kahayang? Aya deui moal nya bioskop di Cianjur? Wallohu’alam bissowab. Wassalam!***