CIANJUREKSPRES – HAYANG AYA DEUI BIOSKOP. Peuting tadi ngotektak film-film dina Ekstra Hard disk. Dipapayan da caritana keur nyalse jeung indung barudak, hayang jongjon lalajo film. “Nu ieu we,“ ceuk indung barudak bari tuluy diputer.
Horeng film carita ditektif karya novelis Agatha Christie. Anu maraenna oge aktor jeung aktris anu geus karahot kayaning George Kennedy, David Niven, Jack Warden, Peter Ustinov, Mia Farrow, Jane Birkin, Olivia Hussey jeung anu sejenna.
Lalajo duaan we jeung indung barudak da sarua resep lalajo film. Basa disebutkeun eta film kaluaran taun 70-an, indung barudak nempas, naha geus aya bioskop cenah di Cianjur taun 70-an? memeh ngajawab ge, uing seuri heula. “Nya muhun atuh, taun 60-an ge di Cianjur aya opat bioskop,“ cekeng, ngan teu tutuluyan da kaburu anteng deui kana lalakon pilem anu keur meujeuhna rame.
Baca Juga:Malam Pertama Ramadan 2023 Korban Gempa Tarawih di Tenda DaruratSambut Ramadan, Warga Kampung Adat Miduana Gelar Ritual Khusus Mandi Keramasan Cai Kahuripan
Ti keur budak keneh geus resep lalajo pilem malah sok ngahaja diabringkeun jeung dulur dulur anu leuwih gede ka bioskop, da kabeneran harita kolot-kolot uing bumen-bumen di Rancabali wetan, ari peuntaseun imah aya bioskop nyaeta bioskop Roxy.
Pilem pangdipikaresepna jaman harita taya lian, mun teu pilem mikimos (mickey mouse), pilem perang atawa pilem koboy. Aeh pilem karajaan siga pilem Ben-Hur, Samson & Delilah ge resep ketah.
Baheula keur budak mah nyebut kana kabeh pilem kartun teh mikimos we da ka beh dieuna keun nyarebut pilem kartun teh, sanggeusna rame tipi, baheula mah nyebutna pilem mikimos we atawa pilem cemen!
Jaman keur budak nu mindeng diputer di bioskop kalolobaanana pilem ti Amerika, film Koboy film Perang (biasana perang antara Amerika jeung Jerman), film ditektip, sasatoan jeung bodor! Mun film romans atawa film bobogohan, uing mah can pati resep da kaasup ‘budak bau pejuh’ keneh.
Film karajaan kaasup kana film anu dipikaresep da nepika ayeuna sok inget keneh saperti Ben-Hur, the Vikings, Quo Vadis jeung sajabana.
Panglalajoan di Cianjur harita karek aya opat. Bioskop Roxy peuntaseun imah harita da keur jadi urang Rancabali Wetan harita mah, jadi pangmindengna lalajo teh, di Roxy bubuhan kari meuntas tea.