Kitu soteh mun seug filmna kaasup kana pilem keur barudak, da harita mah teu bisa sagawayah lalajo siga ayeuna. Najan boga duit keur meuli karcis ge, ari umurna can sawawa jeung pilem nu keur diputer, angger we teu bisa asup!
Harita mah aya katangtuan mun film keur “Semua Umur“ hartina barudak bisa lalajo eta film. Mun “10 tahun ke atas“ hartina budak nu meunang lalajo umurna paling saeutik, kudu geus 10 taun. Aturan harita pangluhurna nyaeta “17 tahun ke atas“ biasana film romans atawa horror nu bisa jadi matak keur barudak nu keur meujeuhna mekar.
Bioskop sejenna ayana kiduleun imah. Deukeut statsion kareta api aya bioskop Sintu (ka beh dieunakeun diganti jadi Sinar) pangmindengna muter pilem India.
Baca Juga:Malam Pertama Ramadan 2023 Korban Gempa Tarawih di Tenda DaruratSambut Ramadan, Warga Kampung Adat Miduana Gelar Ritual Khusus Mandi Keramasan Cai Kahuripan
Aya deui bioskop Dunia Baru jeung Dewi. Baheulana mah ngaranna Bioskop Haji Adil jeung bioskop Great World. Keur budak mah nyebutna teh bioskop Gerit. Pagedeng-gedeng bioskop ‘Gerit’ (Dewi) jeung bioskop Haji Adil (Dunia Baru) mah.
Ari ras ka jaman harita, sok nyerengeh sorangan, sok kapiasem ku polah harita keur budak. Kacipta keneh bakat ku resep lalajo pilem, nepika sok ‘norobos’ ceuk istilah jaman harita mah.
Mun di Roxy sok ngaliwatan jalan tukang, naek kana tembok, tuluy tinggarajleng laluncatan. Tuluy tingselesep asup ka kelas tilu bari talag-tolog, ma’lum ti nu caang asup kanu poek, da bubuhan geus titatadi pilemna diputer teh. Mun salamet tinu mariksa, lumayan bisa nuluykeun lalajo tepika tamat. Mun katohyan mah ku anu jaga, nya wayahna we lapur teu bisa nuluykeun lalajo, malah digiring ku tukang jaga panto, tingkelemes kaluar bioskop.
Tapi najan kitu, ih da teu kapok-kapok. Mun aya kasempetan deui mah, der deui we tingtorobos ka tukangeun bioskop! Mun teu salah mah nu sok jaga panto kelas tilu teh, Bah Ajum, lalaki nu geus umuran najan teu nepika kaasup geus toktoh-tokroh oge.
Mun hayang lalajo pilem barudak, heg duitna kurang, sok ngadagoan rada lila pilemna diputer, terus nyampeurkeun ka Bah Ceng Yan bari ngasongkeun duit saaya-aya. Biasana mun keur alus anginna mah, sok diasupkeun, bubuhan nu bogana bioskop Roxy Bah Ceng Yan teh. Mun teu ka Bah Ceng Yan, nya ka Bah Ajum tea. Malah ka Bah Ajum mah, mun teu boga duit, sok menta bako ka Emang, nu harita dagang bako. Ngahaja we keur ‘nyogok’ Bah Ajum sangkan bisa ngasupkeun ka jero bioskop.