POE MIMITI DINA BULAN PUASA

bulan Puasa
Gambar oleh Pintera Studio dari Pixabay
0 Komentar

Nepika Bandung, mun teu salah kira-kira satengah sapuluh isuk, da mobilna telat, lila teuing ngetem di hareupeun Cap Jago jeung di Ciranjang, jaba loba eureun-eureunan deuih. Kaayaan di Kota Bandung jaman harita, najan geus asup kana bulan Puasa, iiiih, angger we saperti poe-poe samemehna. Anu daragang kadaangan, warung nasi baruka we saperti biasana, nu barang daang, anu ngaroko, tingcamuil, tingpelenyun we di jalan oge, taya karisi taya kahariwang siga jaman ayeuna!

Anu pangheulana didatangan nyaeta Bandar Perhiasan Emas, deukeut Dulatip, asup ka jero gang. Eta salila di imahna, bari milihan perhiasan anu deuk dibeuli, uing ret deui–ret deui ka jero imah, ngarep-ngarep aya nu nyuguhan cai! Lebeeeng nepika pamitan teu sakeclak-keclak acan.

“Dasar sengke! Koret, medit buntut kasiran, mani teu nyuguhan cai-cai acan!“ cekeng kukulutus, anehna deuih harita emang uing ukur mesem we teu ngomentar nanaon.

Baca Juga:HAYANG AYA DEUI BIOSKOPMalam Pertama Ramadan 2023 Korban Gempa Tarawih di Tenda Darurat

Na uteuk anu kacipta harita ukur sirop anu tiis, udud Jisokam, jeung Nasi Rames. Matak, waktu tos beres nganteur Emang, uing mah langsung asup ka Warung Nasi anu ngajajar hareupeun Setatsion Kareta Api Kota Bandung, langsung pesen Green Spot make es batu!

Beres ngalekik Green Spot, langsung mesen nasi rames. Niiiiiiii’maaaat karasana, tikoro anu karasa garing salila perjalanan, langsung rerep. Beres ngahampleu nasi rames, langsung udud Jisokam bari pesen deui Green Spot make es.

Keur ngararasakeun ni’matna “Sarapan kabeurangan“, Greenspot kari sapertilu gelas jeung udud kari sapuluh kenyoteun deui sigana mah, aya urang peuntas, milu ngobrol jeung nu boga warung. Najan teu ngarti basana ge, tapi katangkep yen, kacida cenah di bandung mah, sakitu bulan puasa ge, mani barebas kitu anu barangdahar jeung anu arudud di jalan!

Gebeg! Uing, karek inget yen peuting tadi batur mah rame tarawehan! Udud langsung dikusek-kusek kana asbak! Greenspot anu kari sapertilu gelas ukur dipelong, langsung mayar anu tadi didahar, terus gura-giru neangan superben anu deuk ka Tasik.

0 Komentar